रेड पियरो हे अतिशय सुंदर आणि आकर्षक फुलपाखरू आहे. फुलांच्या मधाएवढंच या फुलपाखरांचं आवडतं अन्न आहे ते म्हणजे पानफुटी. ज्या ठिकाणी पानफुटी झाडं आहेत त्याच्या आजुबाजुला,बागामंध्ये ही फुलपाखरे मुबलक प्रमाणात दिसतात. मग ते शहर असो वा ग्रामीण भाग. हिवाळ्याच्या सुरुवातीस ही फुलपाखरे आपल्याला जास्त आढळतात. आपल्या बागेत जर पानफुटीची रोपटी असतील तर आपण यांचा संपूर्ण जीवनक्रम सहज अभ्यासू शकतो.
फुलपाखरांचे सौंदर्य
या फुलपाखरांच्या पंखांचा वरचा रंग गडद काळा, जांभळी झाक असणारा असतो. खालच्या पंखांची कडा झळाळत्या भगव्या रंगाची असते आणि त्यांच्या टोकाला तपकिरी रंगाच्या दोन बारीक, नाजूक शेपट्या असतात. पंखांचा खालचा रंग पांढरा शुभ्र असतो आणि त्यावर काळे ठिपके असतात. वरच्या पंखाची बाहेरची कडा काळी असून त्यावर पांढरे ठिपके असतात. खालच्या पंखाच्या या काळ्या किनारीच्या आत भगव्या रंगाची जाड किनार असते. त्यावर पांढऱ्या रंगाच्या ठिपक्यांची एक रांग असते. येऊरच्या किंवा आपल्या आसपासच्या जंगलामध्ये हे फुलपाखरू फार कमी दिसते.
फुलपाखरांचा विहार
हे फुलपाखरू अतिशय संथ गतीने उडत असते. हळूहळू पंख फडफडवत ते जमिनीच्यापासून कमी उंचीवर आणि पानफुटीच्या आसपास उडत असते. त्या छोट्या छोट्या गिरक्या घेत थोड्याच वेळात जवळच्या फांदीवर स्थिरावते, आणि पंखांचा भाग उंचावून आपल्या शेपट्या हलवत बसते. यामुळे या शेपट्या त्यांच्या मिश्या असल्याचा भास आपल्याला आणि भक्षकांनासुद्धा होतो. त्यामुळे त्या भक्षकाने जरी हल्ला केला तरी त्याच्या तोंडी पंखाचा शेवटचा भाग येतो आणि जीवावर आलेले शेपटीवर निभावते.
या फुलपाखरांना फुलांतील मध खूप आवडते आणि म्हणूनच ती आपल्याला फुलांच्या अवतीभोवती,बागांमध्ये आढळतात.
फुलपाखरांचं प्रजोत्पादन
या फुलपाखरांची मादी एका वेळेला एकच अंड पानाच्या टोकावर टाकते. असं एकाच झाडावर ती वेगवेगळ्या पानांवर बरीच अंडी घालते. अंड्यातून बाहेर येऊन लगेचच छोटी अळी पानाच्या आत शिरते. दोन पानांच्या आवरणांमध्येच ती तिचा पुढचा सगळा वेळ घालवते. या पानाच्या दोन पातळ पापुदयामधला मांसल गर ती अन्न म्हणून खाते. हे फुलपाखरू अळी रुपात असते तेव्हा त्याला खूप अन्न लागतं.
काही काळातच या पानांमधला आतला सगळा गर संपून त्याजागी त्याच अळीची काळ्या रंगाची विष्ठा साठून राहते. कोष मात्र पानाच्या बाहेरच्या बाजूला पानावर किंवा पानाखाली केला जातो. साधारणत: एका आठवड्यात कोषातून प्रौढ फुलपाखरू बाहेर येऊन त्याचा पुढचा जीवनक्रम सुरू होतो.
फुलपाखरू न्याहाळण्याचा छंद
पियरो गटातील हे सर्वात आकर्षक आणि रंगीबेरंगी फुलपाखरू आहे. फुलपाखरे न्याहाळायचा जेव्हा आपण छंद जोपासायला सुरवात करतो तेव्हा हे रंगीत फुलपाखरू आपल्याला सहज दिसते. या फुलपाखराची दुसरी खासियत अशी की त्याचे अन्न हे पानफुटीचे झाड किंवा हाडमोडीचे झाड असतं. ही दोन्ही झाडं सहजपणे कुठेही आढळून येतात. त्यामुळे ही फुलपाखरं सुद्धा सहज पाहायला मिळतात. या फुलपाखरांच्या मादीने एखाद्या पानफुटीच्या किंवा हातमोडीच्या झाडाच्या पानावर अंडी घातली की त्याचा पुढचा जीवनक्रम सतत पुढे काही महिने त्याच झाडावर वाढतो. इतर फुलपाखरांच्या बाबतीत मात्र असं होत नाही.
त्यांचा जीवनक्रम जर का न्याहाळायचा असेल अथवा त्याचं फोटोसेशन करायचं असेल तर आपल्याला त्याचे आधी अन्नझाड शोधावं लागतं. या फुलपाखरांची जीवन अवस्था ही अतिशय नाजूक असते हे ध्यानात ठेवून त्यांचं निरीक्षण आणि फोटोसेशन करावं लागतं. कारण फोटोज काढताना जर का मध्ये फांदी, पान येत असेल आणि आपण त्या नविन येणाऱ्या फुलपाखराला उचलून दुसरीकडे ठेवले आणि त्याचे पंख जर पूर्ण विस्तार झालेले नसतील तर, त्याला धोका पोहोचू शकतो. त्यामुळे प्रत्येक फोटोग्राफरने आपण त्या इवल्याशा जीवाला धोका तर पोहोचवत नाही ना याची खास काळजी घ्यावी.
