अमेरिकेला एमएस करायचे आहे असे म्हटले की, पटकन त्यासाठी काय काय करावे लागते याची लिस्ट डोळ्यासमोर येते. त्यातील GRE (Graduate Record Examination) GRE महत्वाची एक्झाम आहे. या परीक्षेची सर्व माहिती www.gre.org या अधिकृत वेबसाईट वरून मिळेल, हे आपण आधीच्या लेखात पहिले आहे. या परीक्षेबद्दल काही समज गैरसमज आहेत ते आपण पाहुयात.
दोनदा जीआरई दिली तर…
जीआरई एक्झाम देताना त्यादिवशी तुम्ही किती ‘टेन्शन फ्री’ आहात हे जास्त महत्वाचे असते. अभ्यास तर प्रत्येकाने भरपूर केलेला असतो. पण एखादेवेळी परीक्षा मनाप्रमाणे जात नाही आणि कमी स्कोर येतो. मग बरेच जण दुसऱ्यांदा परीक्षा देत नाहीत. कारण त्यांना वाटते की, दोन्ही परीक्षेचे सरासरी गुण धरले जातात. बऱ्याचदा असे होते की परीक्षा द्यायची इच्छा आहे, पण मग माझा दुसरा स्कोर चांगला नाही आला तर मग काय? त्यापेक्षा न दिलेली बरी. हा बऱ्याच विद्यार्थ्यांचा निव्वळ गैरसमज आहे. दोनदा GRE दिली असेल तर त्यातला बेस्ट स्कोर ग्राह्य धरला जातो.
विशिष्ट महिन्यात जीआरई दिलेली बरी…
युनिव्हर्सिटींना अॅप्लिकेशन करायच्या तारखा साधारणत: नोव्हेंबरच्या मध्यापासून सुरु होतात. त्यानुसार जीआरईची तारीख ठरवावी. पण परीक्षेचा स्कोर हादेखील तितकाच महत्वाचा असल्याने अर्ज करायच्या तारखा पाळण्यासाठी परीक्षा लवकर न घेता संपूर्ण अभ्यासाचे व्यवस्थित नियोजन करूनच तारीख घ्यावी. जीआरई एक्झाम अमुक एका महिन्यात सोपी असते असं मुलां मधे बोललं जातं पण अस काही नसतं. या सगळ्याच्या मागे न लागता व्यवस्थित अभ्यास करून GRE दिलेली चांगली.
गणिताचे (Quant) गुण जास्त महत्वाचे
बऱ्याच विद्यार्थ्यांचा समज असतो की व्हर्बल सेक्शनमध्ये कमी स्कोर आला तरी चालतो. Quant चा स्कोर जास्त महत्वाचा असतो. तर हे असं नसून कुठल्याही कोर्सला अॅप्लिकेशन करण्यासाठी गणिताचा जेवढा जास्त स्कोर असेल तेवढा उत्तमच. पण व्हर्बलचा स्कोरही चांगला हवा. विद्यार्थ्यांना प्रवेश देताना व्हर्बल आणि गणित या दोन्ही सेक्शनचा म्हणजेच संपूर्ण स्कोर किती आहे हे लक्षात घेतले जाते.
Analytical सेक्शनकडे दुर्लक्ष नको
व्हर्बल आणि गणित या शिवाय Analytical Writing नावाचा एक सेक्शन असतो. यात एक Issue essay लिहावा लागतो. बरेचसे विद्यार्थी ह्या सेक्शनकडे दुर्लक्ष करतात. पण ह्या सेक्शनचा स्कोअरदेखील महत्वाचा असतो. बहुतेक चांगली विद्यापीठे प्रवेश देताना ह्या सेक्शनच्या स्कोअरचा गांभीर्याने विचार करतात.
व्हर्बल सेक्शनसाठी नियमित वाचन
नियमित इंग्रजी वाचन असणे हे व्हर्बल सेक्शनमध्ये स्कोअर करण्यासाठी जास्त आवश्यक आहे. पाठांतर करून या सेक्शनमध्ये फार स्कोअर करता येत नाही.
वर्क एक्सपीरियन्स
काही विद्यार्थी 2-3 वर्षे नोकरी करून मग पुढे शिकायचे ठरवतात. अनुभव चांगला आहे म्हणून जीआरई थोडा कमी आला तरी चालेल, असा समज काही विद्यार्थ्यांचा असतो. अनुभव असल्याचा फायदा जरी होत असला तरी त्याने जीआरईचे महत्त्व कमी होत नाही. त्यामुळं जीआरईचा अभ्यास नीट करायलाच हवा.
सेंटरबाबत गैरसमज
अजून एक असा गैरसमज आहे की, काही सेंटरमध्ये जीआरई सोपी असते. तर असं काही नाही.
सब्जेक्ट म्हणजे विषयांशी संबंधित जीआरई
आपण आत्ता पर्यंत जनरल जीआरईबद्दल बोललो. याशिवाय सब्जेक्ट जीआरई देखील उपलब्ध आहेत. गणित, भौतिकशास्त्र, जीवशास्त्र, मानसशास्त्र, बायोकेमिस्ट्री, रसायनशास्त्र, इंग्रजी साहित्य आणि कॉम्प्युटर सायन्स अशा विविध विषयांमध्ये सब्जेक्ट जीआरई उपलब्ध आहे. विशेषत: मानसशास्त्र शिकवणारी विद्यापीठे सब्जेक्ट जीआरईच्या स्कोरबद्दल आग्रही असतात.
जर तुम्ही पुढच्या ऑगस्ट/सप्टेंबर 2025 साठी कोणत्या परदेशी युनिव्हर्सिटीत अर्ज करायचा विचार करत असाल, तर तुमचा जीआरईचा स्कोर नोव्हेंबर 2024 मध्ये आलेला बरा. पण त्याबरोबरच अभ्यास नीट झाला असेल तरच जीआरई देणे योग्य. पुन्हा जीआरई द्यायला वेळ मिळाला तर ठीक नाहीतर अॅप्लिकेशन एक सेमिस्टर पुढे ढकलले जाऊ शकतात.
3 Comments
Khup chan mahiti step by step asalymule Jo kharokhar yapramane tayari Karel to marg gathu shakato itaki mahatvpurn mahiti ani margdashan ya sarv lekhanmadhe ahe Great .
मस्त. माहिती पूर्ण लेख..त्या field मध्ये काम करणाऱ्या व्यक्ती कडून मिळणारी माहिती जास्त authentic असते..याचा परदेशी शिक्षणा साठी जाऊ इच्छिणाऱ्या विद्यार्थ्यांना नक्कीच फायदा होईल..
great work!! 💪😍