ULIP की Term Plan – कोणता इन्शुरन्स योग्य ?

लाईफ इन्शुरन्स म्हटलं की पहिला प्रश्न येतो मी मेल्यावर त्या पैशांचा काय उपयोग ? त्यामुळे इन्शुरन्स घ्यायचा असा विचार केला की क्रमवारीत सगळ्यात शेवटी येतो लाईफ इन्शुरन्स. सगळ्यात तत्परतेने घेतला जातो गाडीचा इन्शुरन्स कारण पोलिसांनी पकडलं तर उगाच दंड भरायला लागू नये, दुसरा नंबर येतो मेडिक्लेम पॉलिसीचा कारण हॉस्पिटलची एक भेट लाखोंचं बिल देऊन जाऊ शकते. या दोन नंतर तिसरा नंबर येतो तो लाईफ इन्शुरन्स पॉलिसीचा….

नेहमीच दुर्लक्षित झालेला विषय आणि त्यात त्याच्यात पर्याय आले की गोंधळात अजून वाढ होते. आज याच पर्यायांना थोड्या सोप्या भाषेत समजून घेऊ.

Term Plan 

Term Plan प्रकारच्या पॉलिसी म्हणजे इन्शुरन्सचा अगदी प्रार्थमिक पर्याय. समजायला अतिशय सोपा ऑप्शन. पॉलिसी काढा, पॉलिसीच्या कालावधीत जर पॉलिसी होल्डरचा मृत्यू झाला तर त्याच्या पश्चात पॉलिसीची रक्कम कुटुंबाला मिळते. याउलट पॉलिसीच्या कालावधीत पॉलिसी होल्डरला काही झालं नाही तर कोणतीही रक्कम त्याला मिळत नाही. म्हणजेच भरलेला हफ्ता वाया जातो. आणि ह्याच मुद्द्यामुळे या प्रकारच्या पॉलिसीला लोकांची नापसंती मिळते.

वास्तविक पाहता अशा प्रकारच्या पॉलिसीचा हफ्ता कमी असतो. त्याच्या तुलनेत मिळणारी पॉलिसीची रक्कम बऱ्यापैकी मोठी असते. म्हणजेच पॉलिसी होल्डरचा जर मृत्यू झाला आणि पॉलिसीची रक्कम कुवतेप्रमाणे घेतलेली असेल तर त्याच्या कुटुंबाला मोठा आर्थिक आधार यामध्ये मिळतो यात काहीच वाद नाही.

पण पैसे भरून परतावा मिळणार नाही ही गोष्ट बऱ्याच लोकांच्या पचनी पडत नाही आणि अशा पॉलिसी टाळल्या जातात.

ULIP प्लॅन 

ज्या मुद्द्यामुळे Term Plan नाकारला जातो त्याच मुद्द्याच भांडवल करून इन्शुरन्स कंपन्यांनी बाजारात आणलेलं प्रॉडक्ट म्हणजेच ULIP प्लॅन. या प्रकारच्या पॉलिसीमध्ये विम्याच्या भरलेल्या हफ्त्याच्या बदल्यात कव्हर तर मिळतच पण त्याच बरोबर काही कालावधीनंतर ठराविक रक्कम परतावा स्वरूपात मिळते. अर्थातच ह्या ऑप्शनला लोकांची पहिली पसंती मिळते त्यामुळे या अधिक लोकप्रिय ठरतात.

पण…

या प्रकारच्या पॉलिसीचा सगळ्यात मोठा तोटा म्हणजे यामध्ये मिळणारे कव्हर पुरेसे नसते. आणि हा मुद्दा पॉलिसी घेण्याच्या मूळ कारणावरच घाला घालतो. दुसरी महत्त्वाची गोष्ट म्हणजे यामध्ये मिळणारा परतावा हा साधारण Fixed Deposits वर मिळणाऱ्या परताव्यापेक्षा कमी असतो. त्यामुळे ना धड गुंतवणूक होते ना धड कव्हर मिळते.. अपेक्षित कव्हर हवे असल्यास हफ्त्याची रक्कम वाढते त्यामुळे आपसूकच कमी कव्हर घेतले जाते आणि मनाचे समाधान होते की आपल्याकडे इन्शुरन्स पॉलिसी आहे, पण ती पुरेशी आहे की नाही हा सगळ्यात महत्त्वाचा प्रश्न अनुत्तरित राहतो…

मग सगळ्यात चांगला पर्याय कोणता? 

Term Plan हाच इन्शुरन्सचा सर्वात चांगला पर्याय आहे. इन्शुरन्स घेताना नेहमी एकच महत्त्वाचा मुद्दा लक्षात ठेवणे गरजेचे आहे, तो म्हणजे “पुरेसे कव्हर”. ‘आपल्या पश्चात आपल्या कुटुंबाची योग्य प्रकारे सोय झाली पाहिजे‘, ह्याच मूळ विचाराने आपण इन्शुरन्स काढायचा विचार करतो, त्यामुळे त्याला सगळ्यात जास्त प्राधान्य दिले गेले पाहिजे. इन्शुरन्स घेताना परताव्याची अपेक्षा ठेवणे म्हणजे इन्शुरन्सला गुंतवणूक समजण्यासारखे आहे, जो पूर्णपणे चुकीचा विचार आहे. इन्शुरन्स आणि गुंतवणूक ह्या दोन वेगळ्या गोष्टी आहेत आणि त्यांना वेगळे ठेवणेच सगळ्यात जास्त फायदा करून देते.

उत्पन्नाला सुरुवात झाली की गुंतवणूक सुरू करण्याच्याही आधी स्वतःचा Term Plan आणि कुटुंबाचा मेडीक्लेम काढून घ्यावा. वय कमी असल्यामुळे फारच स्वस्तात Term Plan मिळतो आणि त्याचा हफ्ता वयाप्रमाणे वाढत नसल्यामुळे, वाढत्या उत्पंनाबरोबर काही वर्षातच तो हफ्ता नगण्य वाटतो. लाईफ आणि हेल्थ सुरक्षित करून घेतली की आपोआपच तुमची गुंतवणूक सुरक्षित होते जे तुमचा श्रीमंतीचा रस्ता सुखकर करते…